【Now財經台】美國昨晚(25日)出爐嘅2月消費者信心指數跌至98.3，遠差過預期，反映美國總統特朗普(Donald Trump)嘅政策為經濟帶嚟不確定性，更令衰退憂慮再度升溫。美國10年期國債收益率更跌至今年最低水平，似乎反映「特朗普交易」(Trump Trade)正逐步降溫。若未來真係爆發大規模關稅戰，消費者及企業信心係咪會繼續下滑？
潤淼資產管理董事盧志威指，消費信心下降係正常，因為關稅對消費者有直接影響，不過，唔需要對零售業下滑睇得太悲觀，如果真係爆發大規模關稅戰，零售業反而有機會出現反彈，因為加關稅前或會出現一波消費潮。
William又話，依家股市主要受兩大因素影響，首先係「Trump Trade」熱潮降溫，其次係內地人工智能(AI)大模型DeepSeek橫空出世，令成本大幅降低，長遠而言，對AI技術發展係好事。 佢又認為，消費信心短期仍會疲弱，但相信股市唔會因為咁而大幅調整。
