【Now財經台】截至早上11時止，1小時內《彭博》用戶搜尋量最多港股，依次為中芯國際(00981)、小米集團(01810)、西部水泥(02233)、騰訊控股(00700)及地平線機器人(09660)。
據《彭博》今日(25日)報道，美國總統特朗普(Donald Trump)要求盟友配合，進一步收緊對華出口晶片管制，限制中國半導體設備維修保養，要求相當辣，並指部分美國官員有意將英偉達(Nvidia)對華銷售晶片限制，擴至依家毋須預先獲得出口許可嘅產品。
《路透》就報道，因DeepSeek大模型出現而引發需求，騰訊及阿里巴巴(09988)已加單買H20晶片，若美國進一步限制對華晶片出口，包括H20晶片，對騰訊呢類大型科企嘅人工智能(AI)發展前景有咩影響？
富途證券首席分析師譚智樂指，現時整個市場更願意追入AI相關股，研發半導體嘅中芯自然有更多資金流入，DeepSeek用嘅H20晶片本來就唔喺制裁名單內，但唔排除將來會被納入，亦係近期對H20晶片需求大增嘅原因，但過往有呢類消息傳出時，市場會擔心對AI發展帶來好大阻礙，但依家市場意識到AI發展方面，雖然運算力重要，但唔係唯一關鍵，因此，預期市場對呢類消息嘅敏感度將會下降。
