【Now財經台】中國海洋石油(00883)出咗2025年指引，投資者最關注一定係派息比率，中海油將派息比率由40%上調至45%，又預期未來3年派息比率都唔會低於45%，但值得留意係，集團取消咗2022年至2024年都有提及，每股派息最少0.7元嘅承諾，中海油股價今日(23日)幾乎全日受壓，但跌幅唔算大，係咪反映投資者都對指引有啲意見？
耀才證券研究部總監植耀輝指，認同摩根士丹利嘅睇法，即係倫敦布蘭特期油唔跌穿每桶50美元，中海油每股派息都可以派到0.7元以上，不過，由於油價走向存在不確定性，一旦失守50美元，派息就有機會少過0.7元。
Stanley續指，中海油喺2022年回歸A股，每股派息最少0.7元嘅承諾，當時對股價有好大幫助，依家冇咗呢個承諾，加上上調派息比率嘅幅度唔算吸引，相信會令唔少投資者好失望。
