【Now財經台】中國燃氣(00384)股價今日(2日)一跌到尾，今朝低開唔夠1%，但跌幅好快擴大至逾7%，低見5.97元，之後收復部分失地，收市報6.23元，跌逾3%，成交股數較過去100日同時段平均增2倍。
中燃中期業績表現一般，收入按年跌2.6%，純利跌3.8%，但毛利率仲有得升，但下調明年售氣量增長指引，大行普遍喺業績後降中燃氣目標，不過，滙豐證券仍力撐中燃，認為業績倒退只係短暫，長遠增長仍然喺正軌，不過，滙證其實喺上個月已3度下調中燃目標價，由7.2元降至最新6.5元。
技術走勢方面，中燃今日一度失守6元，釋出一個不利訊號，因為今年低位都係6元以下，只不過9月遇到政策大升市，股價跟大市反彈，後市仍要睇實6元呢個關鍵位。
