【Now財經台】截至早上11時止，1小時內《彭博》用戶搜尋量最多港股，依次為新世界發展(00017)、廣汽集團(02238)、美團(03690)、農夫山泉(09633)及碧桂園(02007)。
廣汽今日(2日)傳嚟同華為合作嘅消息，雙方會合作發展高端新能源車品牌，刺激股價一度勁升逾24%，雖然幾個月前，廣汽已傳出同華為合作嘅消息，9月亦簽過數字化戰略合作備忘錄，如果睇返股價表現，今日呢個消息係咪好大驚喜？
富昌證券聯席董事譚朗蔚指，華為同內地唔同新能源車廠都有合作，但今次同廣汽嘅合作就有啲唔同，加上廣汽新能源車發展落後於同業，發展空間相對較大，令市場對今次合作有憧憬。消息一出，廣汽股價今日爆升，更突破橫行格局，佢建議有貨嘅投資者可以繼續持有，留意未來兩日會唔會有短線獲利機會，但冇貨唔建議現價追入，因為現時已嚴重超買及單日升幅太大，留意後市有冇機會喺3.2元水平做部署。
