【Now財經台】大家樂集團(00341) 今日(28日)中午派咗成績表，半年少賺28%，收入就按年跌1.2%，毛利率亦跌至10.3%，雖然公司賺少咗，但中期息維持15仙，公司財務狀況唔錯，依家手頭現金有逾10億元，7.3厘嘅股息率頂唔頂得住股價？未來派息會唔會有變？
華盛證券財富管理部董事李偉傑指，7.3厘股息率仲頂得住股價，如果綜合大家樂上季尾及今次中期業績，兩次業績加埋有逾7厘，而關鍵係嚟緊嘅末期息可唔可以去返0.42元水平，由於派息係同企業盈利掛鈎，所以今次中期息派到15仙已經係一個驚喜。
Jason續指，從收息角度看，大家樂都幾理想，但不確定性仍然好大，主要同毛利率有關，由於消費模式唔同咗，北上消費等都會影響本港餐飲業嘅業績及派息，大家樂毛利率最新跌至10.3%，唔排除未來進一步跌至10%或以下。
