【Now財經台】美國候任總統特朗普(Donald Trump)指，喺明年1月20日上任後會向進口加拿大原油徵收25%關稅。美國石油企業警告，呢個舉動會直接加大企業成本，繼而轉嫁畀消費者，令通脹有上升壓力。若加拿大反制美國，美國向加拿大輸出嘅貨品，一樣面臨高關稅，美國最終向加拿大進口原油徵稅嘅機會有幾大？
資深經濟分析師羅家聰指，美國有一半進口原油來自加拿大，一旦加拿大真係向美國採取反制措施，美國唯有走遠啲向沙特阿拉伯及伊拉克買油，但一定有成本壓力。
但KC認為，特朗普應該只係向加拿大「打咀炮」，佢要徵原油關稅主要係加拿大將毒品運入美國，但冇必要用到貿易戰及關稅，始終美加距離近，貿易關係好強，就算真係向加拿大原油徵稅，都唔會持續好耐。
