【Now財經台】截至早上11時止，過去1小時內《彭博》用戶搜尋量最多港股，依次為ESR(01821)、中芯國際(00981)、吉利汽車(00175)、康方生物(09926)及萬科企業(02202)。
物流倉儲股ESR曾喺5月公布，指收到美國投資公司組成嘅財團出提私有化建議，刺激股價一度衝上13元水平，市場亦一直關注私有化有咩進展，ESR股價今日(28日)逆市升，一度高見11.7元，升近5%，係咪憧憬私有化有進展？
椽盛資本投資總監曾永堅指，中央近期都有政策支持促進物流業發展，亦見到有多家航運公司近年都有收購合併，針對喺內地有策略性目標、物流相關資產項目，以致全面入股行動，所以以ESR背景同股東結構而言，市場有憧憬都係合理。
Jaseper續指，ESR股價早前喺12.82元高位回落到10.42元，經過較明顯嘅調整後，今日出現反彈，但成交未見大增，所以唔排除只係借憧憬做短線炒作，冇貨嘅投資者，建議等股價落到11元以下再做部署，呢個位博私有化較合適。
