【Now財經台】主要從事供水業務嘅粵海投資(00270)，股價今朝(28日)高開4%後，升幅一度擴大至5%，高見4.95元，其後升幅收窄，成交股數較過去100日同時段平均增近1倍。
粵投昨日(27日)收市出通告，指會喺12月9日舉行嘅董事會考慮批准派特別息，如果成功落實，將會係公司首次派特別息。雖然消息正面，但粵投股價今日表現及交投都唔突出，始終依家距離開董事仍有成個星期，更重要係，公司財政狀況唔算好，突然宣布派特別息令人費解。
粵投股價今日一舉突破10天及20天線，但喺50天線水平遇阻，可能要到12月初臨近開董事會前，股價先會有較大炒作。
