【環球金融快線】Zoom改名都好難轉運

【Now財經台】雲端視訊會議技術服務供應商Zoom出咗第3季業績，收入按年增長4%，每股基本盈利按年增長48.9%，但股價昨晚(26日)喺美股收市後延長交易時段急挫，明明呢份業績略好過預期，但股價反應咁負面，係咪市場對科技股業績期望過高？

易方資本投資總監王華指，Zoom嘅用戶黏性唔明顯，變現能力相對較弱，隨著行業競爭加劇，自然受到更大嘅負面影響。佢又話，集團改名Zoom Communications，但其實分別唔大，即使早前推出人工智能(AI)Companion 2.0，但市場仍較難將Zoom及AI元素連繫，加上可以使用嘅情境唔多，對業績整體提振作用唔大。