【Now財經台】截至早上11時止，1小時內《彭博》用戶搜尋量最多港股，依次為蜜雪集團(02097)、希慎興業(00014)、新世界發展(00017)、信義光能(00968)及普拉達(01913)。
新世界上星期出咗中期業績，公司指，計劃出售杭州寫字樓套現還債，但大行普遍維持負面睇法，因為公司負債比率冇改善，並繼續錄得負現金流，不過，新世界股價今日(3日)向上，上周至今已累升約20%，係咪股價太殘投資者博見底反彈？
富昌證券聯席董事譚朗蔚指，新世界開始變賣資產嚟還債，但依家樓市仍然疲弱，變賣資產嘅幫助有限，佢提醒投資者仍要小心新世界嘅債務危機，近期強勢可以視為跌後反彈，又指股價喺6.2元水有好大阻力，短線反彈可以睇6.2元，但認為新世界仍然唔係行業首選。
