【Now財經台】截至早上11時止，過去1小時內《彭博》用戶搜尋量最多港股，依次為美團(03690)、創科實業(00669)、古茗(01364)、比亞迪股份(01211)及瑞聲科技(02018)。
據內媒報道，京東集團(09618)正式啟動外賣服務，今年5月1日前登入平台嘅商家可以全年免佣，嚇到競爭對手美團股價今早(12日)一度大跌7%，但點解連京東股價之後都要倒跌？集團點解要進軍外賣市場？
資深證券分析師彭偉新指，美團係內地外賣平台一哥，好難挑戰佢嘅地位，即使京東好揼本去搶市佔率，其實作用都唔大，始終市場對鬥平、免佣呢啲競爭手段唔太受落，呢個亦係京東股價倒跌主因。
Castor續指，若美團不惜減少收入提供補貼等方法還擊，會對收益構成負面壓力，所以即使美團未出手，市場已經開始擔心，美團未來除咗增加科技投資，從而降低營運成本，例如用無人機送餐、送件，甚至擴展海外地方，另一方面又要應對京東嘅挑戰，難免為股價增添不明確因素。
