【Now財經台】ASMPT(00522)今朝(3日)開市前出通告，進一步披露去年10月出售附屬公司先進封裝材料嘅詳情，將會收取A股上市公司2900萬股新股及現金7.98億人仔，作價17.17億人仔，市帳率(PB)約1.2倍，算唔算貴？
《香港股票財技密碼》作者梁杰文指，作價對比現水平1.4倍嘅PB低，但屬合理水平，原因係先進封裝材料業績比較波動，加上交易後能夠換到一堆現金以及A股上市公司嘅股份，若然整合做得好，有機會因重組成功而炒高股價，所以ASMPT先願意平少少賣先進封裝材料。
Mike又估計，由於內地喺人工智能(AI)方面發展迅速，半導體需求將會以幾何級數上升，相信公司想儘快落實交易對價，快啲喺市場上分一杯羹，所以加快咗今次ASMPT嘅出售交易。
