【Now財經台】蘋果公司(Apple Inc.)宣布未來4年會喺美國投資逾5000億美元，創造2萬個新職位，或會為內地供應鏈帶來隱憂，不過，但手機相關股今日(25日)股價未受影響，高偉電子(01415)、瑞聲科技(02018)及舜宇光學(02382)都逆市有得升。不過，計劃仲包括同鴻海旗下富士康合作，喺休斯敦興建佔地25萬平方呎的新工廠，預期2026年投資，生產支援Apple嘅人工智能(AI)系統Apple Intelligence伺服器，旗下嘅其他子公司如富智康集團(02038)同鴻騰精密(06088)又可唔可以跟埋受惠？
天風國際證券經紀業務部董事李偉傑指，今次投資嘅焦點在於半導體同AI項目，而舜宇等公司主要負責幫Apple做鏡頭、組裝等，所以今日呢類股份冇明顯受壓，暫時未受拖累，政策面亦冇太大壓力，但唔排除將來會有新動作。不過，Apple好難將所有鏡頭或組裝等業務全部搬返去美國，若出現呢個極端情況，其他手機設備股都會受影響。
Jason又話，Apple嘅投資計劃依家仍喺初步階段，暫時未知其他子公司可以受惠幾多，又或者可唔可以受惠，目前主要同鴻海嘅關係最為密切。
