【Now財經台】攜程集團(09961)今朝(25日)開市前出咗業績，股價午後愈跌愈多，一度大跌逾12%，低見459.4元，包辦表現最差藍籌及科指成分股。雖然去年純利及收入都有增長，但全年增速唔及去年上半年，反映受下半年增長放緩拖累，呢個係咪市場唔收貨嘅地方？點睇集團未來增長動力？
信達國際研究部董事趙晞文指，雖然全年計盤數冇驚喜，但仍符合預期，雖然去年第4季收入按季大跌近70%，但仍好過預期，原因係第4季唔係傳統旅遊旺季，加上公司海外平台仍處於投入期，所以按季表現的確會令市場失望，所以股價喺業績後回套係正常。
晞文又話，分析攜程收入時，除咗睇定單量，亦要睇埋價格，由於價格係由市場供求決定，由於疫後供應仍然緊張，令產品價格上升，而復甦期過後，產品價格只係逐步回落至正常水平。佢認為，未來要留意公司定單增加可唔可以彌補價格下跌嘅影響。
