【Now財經台】截至早上11時止，過去1小時內《彭博》用戶搜尋量最多港股，依次為中國聯通(00762)、比亞迪電子(00285)、濰柴動力(02338)、聯想集團(00992)、小米集團(01810)。
阿里巴巴(09988)指，未來3年投資喺人工智能(AI)基礎設施嘅資金，規模相當於過去10年總和，自DeepSeek出現後，投資者對內地AI發展信心大增，AI周邊產業係咪都一定會受惠？有機會受惠嘅濰柴，股價今早(21日)一度升7%。
富途證券香港首席策略師陸秉鈞估計，科技股炒作已去到尾聲，資金已進入板塊輪動嘅操作，相信濰柴作為內地最大柴油發電機生產商，若AI產業中涉及柴油發電嘅需求增加，濰柴絕對可以受惠。佢又認為，濰柴股價穩步向上，有實質基本面支持，派息率亦不過不失，唔想追高科技股嘅投資者可以考慮濰柴。
Alan又話，AI周邊概念股同大市氣氛息息相關，當大市成交唔再增加，甚至縮減，周邊股份就會首當其衝而回落，佢提醒投資者可以先判斷大市係咪仍然向上，如果覺得風險高就唔好高追，又話部署濰柴喺14元水平會較為合適。
