【Now財經台】截至早上11時止，過去1小時內《彭博》用戶搜尋量最多港股，依次為友邦保險(01299)、快手(01024)、阿里健康(00241)、美團(03690)及舜宇光學科技(02382)。
友邦股價今日(13日)一度升逾7%，滙豐證券今日亦唱好公司，指市場低估咗友邦業務持續增長能力，友邦股價及業績係咪都值得睇好？
椽盛資本投資總監曾永堅認為，友邦去年內地及香港銷售持續理想，市場預期，集團新業務價值按年將錄得雙位數增長。股價方面，佢認為友邦持續落後，主要受兩個因素影響，美國息口走向不斷出現變數，最新更有分析估計，聯儲局今年有可能唔會再減息，令美國長債息扯高，不利友邦股價，其次係友邦需時完善及消化內地業務嘅負面影響。
Jaseper又話，由於國際性保險公司或多或少會涉及內房相關債券，若內房出現持續及實質性轉機，可以為友邦股價帶嚟正面影響。佢又相信，友邦股價要真正突破50天線，以及企穩55元水平，先有機會扭轉技術上反覆下跌嘅趨勢。
