【Now財經台】截至早上11時止,過去1小時內《彭博》用戶搜尋量最多港股,依次為聯想集團(00992)、舜宇光學科技(02382)、領展房產基金(00823)、瑞聲科技(02018)及地平線機械人(09660)。
聯想股價暫時已連升第4日,之前3日累升23%,集團最近公布同國產圖形處理器(GPU)領軍企業沐曦,聯合發布DeepSeek一體機解決方案,聯想明明係中美貿易戰「風眼股」之一,係咪因為DeepSeek效應,令股價近排升唔停?聯想喺AI領域嘅潛力有幾大?
椽盛資本投資總監曾永堅認為,聯想受中美貿易戰影響係不爭嘅事實。美國總統特朗普(Donald Trump)上場後,加大咗中國科技相關領域及產品嘅制裁力度,所以市場對聯想嘅相關產品未來喺美國銷售已有風險意識,但佢認為,中國喺DeepSeek爆紅前,市場已識到中國嘅人工智能(AI)以「有增冇減」嘅步伐去推進發展,所以資本市場上相關題材較受資金追捧,甚至蓋過中美貿易戰帶來嘅風險。
Jaseper又話,聯想喺內地市場GPU或AI發展必須加強硬件、基礎投資,以及加快國產化步伐,由於聯想相關嘅伺服器受惠於AI投資加速,所以市場對聯想估值重估,而對未來盈利增長潛力睇法亦樂觀,佢估計,聯想股價見12元水平應該冇難度。