【Now財經台】美國總統特朗普(Donald Trump)埋位後隨即宣布全國能源緊急狀態，計劃增加石油天然氣產量，刺激油價錄得兩個月來最大單日跌幅，中國海洋石油(00883)股價今日(22日)已連跌第4個交易日，一度低見18.64元，跌1.5%，如果想部署好倉，應該揀牛證還是CALL？CALL普遍有10倍槓桿，夠唔夠博反彈？
星展香港環球金融市場上市產品主管周國威指，睇返近期市況及行情，CALL/PUT輪較牛熊證可取，因為市場依家有機會受消息主導，裂口高或低開後，再掉頭嘅風險都唔細，所以即使CALL嘅槓桿冇牛證咁高，但冇收回風險會較可取。
Dick續指，中海油係「中特估」龍頭，經過半年整固，引伸波幅約30%，普遍喺2025年第1季底至第2季初到期嘅CALL，價外10%至20%，槓桿10倍。此外，有資金趁中海油股價回調至18元低位，吸納今年4月中到期，價外20%，行使價22元嘅CALL，呢類CALL槓桿效應唔錯，時間又唔算太短，用嚟以小博大都可取。
