【Now財經台】截至早上11時止 ，過去1小時內《彭博》用戶搜尋量最多港股，依次為新世界發展(00017)、ESR(01821)、康方生物(09926)、萬科企業(02202)及美團(03690)。
新世界負債比率持續高企，市場十分關注集團債務問題，新世界下周將正式被剔出藍籌，雖然集團已「兩出兩入」，但係咪仍會加劇股份沽壓？還是市場對集團減債進度都樂觀，對新世界睇法會比之前正面？
大華繼顯執行董事梁偉源指，新世界股價持續低迷，但市場基本上已消化咗要繼續減債、踢出恒指成分股呢啲負面因素，但出售啟德體育園消息，對股價及債務幫助唔大，因為僅涉及逾4億元，相對於公司嘅債務，或出售新創建集團(00659)、前海大廈部分股權，講緊係近240億元，市場依家較關注新世界未來出售資產情況，希望可以攞返多啲現金返嚟還債。
Steven又話，另一方面亦要睇美國減息步伐，因為市場預期明年減息步伐可能較慢，不利高負債企業，佢估計，新世界剔出藍籌後，股價仍會持續低迷。不過，如果公司喺出售資產方面有較理想進展，現價其實係偏低。
