【Now財經台】小米集團(01810)首座喺武漢嘅智能家電工廠奠基動工，2026年實現量產，小米股價兩連跌後，今朝(27日)走勢反覆，一度高見27.6元，升1.4%，多唔多好友趁股價回調入場？CALL槓桿普遍介乎4倍至6倍，行使價應該點擺？
中銀國際證券衍生產品部董事朱紅指，小米係ATMXJ之中較強勢嘅科技股，股價繼續喺高位徘徊，估計回一回之後有機會再挑戰29元，甚至30元水平，始終基本因素唔錯，汽車銷量亦理想。
佢又話，市場上較活躍嘅小米CALL，行使價38元，明年6月到期，槓桿5倍至6倍，而呢類條款都比較適合依家嘅市況。
