【名家給力場】港股今輪升浪最少持續至「兩會」前

【Now財經台】DeepSeek引爆港股今輪升浪，恒生指數昨日(13日)一度衝破22000點關口，但其後喺高位回套，最終由飆逾600點變倒跌完場，但今日(14日)再度發力，迫近22600點，仲升穿昨日高位，港股今輪升浪會持續幾耐？

冠域商業及經濟研究中心主任關焯照指，呢個係等咗一段短時間嘅調整，過去1個月恒指累升逾3000點，期間冇乜回套，所以今次即日回套都會令投機者知驚，而一啲權重股都有回落，例如騰訊控股(00700)、阿里巴巴(09988)等，昨日嘅回調都算係一次健康調整。

關博士又認為，就算冇DeepSeek，港股都會喺低位反彈，因為一般喺「兩會」前，市場都會有政策憧憬，呢段時間嘅人工智能(AI)發展只係令大市彈多啲，佢又估計，今輪升浪最少持續至「兩會」前，不過，如果「兩會」期間指數升得太多，中央可能會減低政策嘅力度，因為內地股市近期偏向「慢牛」，所以到時會出現更大幅度嘅回套。