【期匯決算】呢個位做空Yen較值博

【Now財經台】美匯指數兩連跌後，今日(6日)回升，但仍受制於108水平，日圓喺十國集團(G10)貨幣中一支獨秀，美元兌日圓一度跌穿152水平，最新有日本央行審議委員認為，要喺2025年財年下半年最少加息至1厘水平，即最少要加息0.5厘，言論刺激日圓進一步轉強，日圓後市會點走？

亨達集團助理總經理羅明立指，日央行未來加息步伐仍要觀察，始終有美國總統特朗普(Donald Trump)嘅關稅政策、日本加薪情況及通脹變化等不確定性，佢估計，日圓喺151水平會有支持，即使日央行加息，但步伐唔會好快，加上美國聯儲局今年減息次數應該比預期少，都有利美元向上，預期美匯指數喺106.8會有支持。

佢又話，可以等美元兌日圓彈上154水平先做空，日圓未來有機會下試去年第4季低位，即148至149水平，到時做空值博率相對較高。